車王李的海鮮酒家生不逢時，在股市狂跌之後開幕，但仍可說是有幸有不幸。幸者是他把十多年做汽車經紀的積蓄全投放在酒樓裡，避過了股市大屠殺，不幸者是現時市面消費力弱，海鮮酒家首當其衝受到影響。

酒家開張之前，車王叫我找過命理張去看看，他沒表示會依行規付錢，所以命理張連生財用具（諸如羅盤）都沒帶便赴會，來到便四處走一趟，行行企企，停留十分鐘之後，對鏡的擺放和大門方位開設提了小小意見便算。到我離開時，車王李對我說，在酒樓一切上了軌道之後，再約我們幾個去試菜，大概在十月八日，開業一個月之日。

命理張說，車王李如此縮骨，一定要我叫齊眾兄弟去赴會，到時叫魚翅來漱口，實行食餐勁嘅。

約會定了在這晚七點。我的基金會五位股東都有空出席。車王李這家海鮮酒家開在港島東區新商場裡，我約定陸老闆於六時許在尖沙咀凱悅酒店碰頭。我在辰衝書裡店內看看到關門才施施然走過對面。紅磡過海底隧道時照例塞車，我們當然選坐地鐵。來到新商場，踏入酒樓貴賓房之時已過七點，各位食客皆已經全部到齊。這晚我會在席上公佈我們基金會盈虧情況，所以各人準時到會，完全可理解。

飯宴一開始便上一大窩翅，每人一大碗，各人漱完口之後。我便向各股東說：「各位放入基金嘅錢，充滿血汗淚，小弟唔敢將佢輸咗去，誓要維護各位嘅利益。上星期五股市收市價計數，各位大概損失五個巴仙，大家可以放心。今次香港大市跌了五十個巴仙，而我哋損失咁少，可說係不幸中嘅大幸。」

「跌千一點果個黑色星期一，當日你點做呀？」陸老闆向我表示關心。

「我根本冇做嘢，成日個心都卜卜跳，整個人好似突然虛脫咗咁。行步路都覺得腳步浮浮。」我說。

「點解你果日又會沽到期指嘅？」OK華插口問。

「講起上嚟，真係冥冥之中得到上天保佑。係果日，我瞓到十一點幾鐘仲未起身，突然間聽到雀仔聲，吱吱喳喳係度嘈，原來有隻雀仔企係窗前，佢身上有血，有一邊身嘅毛甩晒，可能俾麻鷹啄親。我扭開收音機，正在報告新聞同財經消息，話恆生指數跌嘅二百幾點，我成個人即刻驚醒，立即落床洗面。果日肥佬黎仲未由美國返嚟香港，我無人好問，睇完《信報》同《東方》，都唔明點解股市會跌得咁急，跟住商業一台再報告，股市跌咗三百幾點。我打電話俾肥佬黎果間股票行，佢地話個股市唔係跌，而係冧，無人肯接貨，我想出貨都出唔倒。我果陣時就即刻想到沽期指來幫補，但係冇咗肥佬黎幫我打電話，我都唔知去邊度做買賣。」

此時，女侍上了一道又一道菜，把檯面放滿了，但各人都在聽我講黑色星期一的經過，而沒有舉箸。

「後嚟我走上旺角寶生銀行，只見人山人海，擂針不入，此時醒起自己未曾在寶生買賣過期指，所以要交訂金，於是立即打電話給媽媽，要她把我的和她的寶生外幣存摺全部拿來，把澳洲幣和紐西蘭幣全部賣出，套港幣來交訂金。」

「麻煩到伯母，仲要用佢老人家嘅錢嚟救我地，真係多謝佢。」詩人小念說。

「好多人都等住沽期指，我等咗好耐，終於佢哋幫我沽咗五張。我沽果陣時，三千四百幾點。沽咗之後，指數一直跌，到十月三十號自動平倉，二千點結數，一張賺一干四百幾點，五張賺七千幾點，一點五十蚊，一共賺咗三十六萬。沽期指賺嘅錢差唔多可以冚番果條數。」

「咁你還番你媽媽嘅錢未呀？」說話是天成，他現在有一個外號叫Yummies（Young Urban Marxist是也）。

「啱啱今日攪掂，呢兩日澳元同紐西蘭紙都升番好多，佢果陣時借錢俾我，依家仲有着數添。」

「你媽媽賺錢係另外一回事，佢借過錢俾我地，幫我哋賺一筆，我哋就要回敬番佢，好唔好送番個富格林金幣俾佢呀？」自命馬克思學徒的百強今次突然間變得很有人情味。

「依家潮流興抵制南非，買金幣就要買加拿大楓葉金幣，一就係買澳洲果隻成龍金幣。」OK華爭先說。

「成龍果隻……好似唔係叫……」小念像懷疑自己作品那樣猶豫。

「係鴻運金幣。」還是陸老闆想到。

「咁買幾大個呀？」百強說。

「梗係一安士啦，唔通十分之一安士都送得出手咩。」OK華爽快地提議。

是晚車王李請我們食飯，原意要我們宣揚他的海鮮酒家，怎知我們自己友的話題，跟飯局原意風馬牛不相及。

當初我們成立基金會，本來就有聯誼性質，我身為基金經理，自然有義務為大家安排康樂活動。「到年尾個市點都會再升多少，我計過，如果升到二千六百點，我地每個人起碼都有六萬蚊紅利。你地有冇諗過點用！？」

「今次全球股市大跌，係神對人貪心的一種懲罰，我哋倖免於難，我提議用果萬零銀去還神。」陸老闆無疑比我們這一輩世故。

「還神都好正路，尋日星期日我去大球場聽包樂博（Luis Palau）嘅佈道大會，去完之後真係覺得對生命充滿咗信心。」天成說。

「挑，你係唔係信尼采啊！？尼采有叫你去聽耶穌咩！？」百強明顯地不忿。

「你就當我去食精神鴉片啦，我搵錢好辛苦，今次我的財產幸保不失，我就覺得應該去還吓神。以前讀書果陣時我係大球場聽過一次賈培理講道，今次係第二次去聽，散場時留意每個人，大家守秩序不爭先恐後，我確實覺得對生命多咗信心。尋日我仲撞見許冠文。佢都話聽完之後個心寧靜好多。」天成以前是憤怒青年，但經過十多年打滾之後，他的脾性已愈來愈溫和。

利用分紅的錢去旅遊兼還神，是不錯提議，而我心目中理想還神地點是台灣高雄佛光山，那裡是八十年代佛教企業最成功例子。佛院主持同時建設了酒店、渡假休憩勝地、醫院等，精神與物質都十分充實，該個佛教地區觀念新穎，值得我們城市戰士去看看和學習。

「佛光山好就好，不過我覺得去西方宗教發源地酬神就仲好。股市係西方人攪出嚟嘅，所以去耶路撒冷好似比較適合D。」陸老闆有這樣提議。

「去耶路撒冷過聖誕節都幾好喎，我小學三年班就做過三皇來朝、耶穌係馬槽出生果齣戲，我想睇吓個真馬槽等咗好耐。」OK華回憶起舊事來。

「如果大家唔抗拒參加旅行團的話，國泰有個團去希臘、以色列、意大利羅馬同埋拿波里，十二日收萬二三銀，又幾適合我地。」我常看香港各旅行團的冊子，所以隨口講出這份資料。

「今時唔同往日，有得去遊埠仲嫌乜嘢丫！」OK華最實際。

大家都有相同想法，於是耶穌誕酬神團，就這樣在吃臘味糯米飯時候決定。

本來臘味飯是粗菜，但陸老闆卻吃得津津有味。他感慨地說：「千慳萬慳，唔夠一鋪攤。我練咗一年氣功，近年呢排個市弱，影響心情冇心機練習，身體即刻唔妥，依家夜晚瞓覺，一晚落床去廁所兩三次，以前都唔駛疴夜尿嘅。」

「依家香港人十個行埋九個精神緊張，夜晚瞓得唔好，瞓覺最緊要，一瞓得唔好，乜嘢暗病都會現出嚟。你咁食得，又咁好身子，個肝同腎冇乜事嘅，只不過陰火太盛。你飲吓水魚湯，又去國貨公司買番隻六味地黃丸食吓，多D去泰國、韓國旅行。包保好快冇事。」天成看過大陸的中醫書，所以便隨時給人開處方。

「講起東南亞旅行，我又打算明年利用中期息，安排大家去漢城睇奧運會。」我趁大家高興，猛放好消息。

「好呀，一九六四年我讀小學六年班果陣時，伏在收音機聽楊傳廣同Johnson爭十項全能冠軍，成個人第一次進入狂熱狀態。後來楊傳廣輸咗攞第二，我寫咗封慰問信托《香港時報》轉交俾楊傳廣。我當時發誓，第二日大咗之後一定去看奧運會，看中國人攞金牌。」OK華今晚特別懷舊。

「明年奧運最好睇，加拿大Johnson同美國Lewis爭一百公尺冠軍，係世紀之戰。」小念說。

「乜都係假。係奧運期間去韓國，你可唔可以保證全程一定住單人房呀？去韓國，住單人房係規矩嚟喎。」百強有這樣要求。

香港人真奄尖，我猜想，他日我們去到耶路撒冷，看不到真正馬槽，OK華會有可能要求耶穌回水。

飯宴在十時許結束，整晚所見，車王李酒樓生意平平。在回家路上，陸老闆批評食物，說那些養魚海鮮質素很差，難以吸引食客。他說：「車王李今次投資酒樓，其實跟投資股票一樣，都係難逃一劫。」他的話令我不寒而慄，不過，我受的精神壓力已經太大，已不能再顧慮朋友的生意了。我為了保持自己心理平衝，我現在只想着，在十二月底或一月底，會在羅馬或拿波里，看看當年世上最優秀足球員馬勒當拿的表演。

#####

[ #1987 #張氏起居注 ]